हरिः ओम्

Sloka Text in Telugu , Kannada, Gujarati, Devanagari, English

|| Om tat sat ||

||ಓಮ್ ತತ್ ಸತ್||

ಸುಂದರಕಾಂಡ.
ಅಥ ಷಟ್ರ್ತ್ರಿಂಶಸ್ಸರ್ಗಃ

ಭೂಯ ಏವ ಮಹಾತೇಜಾ ಹನುಮಾನ್ ಮಾರುತಾತ್ಮಜಃ|
ಅಬ್ರವೀತ್ ಪ್ರಶ್ರಿತಂ ವಾಕ್ಯಂ ಸೀತಾ ಪ್ರತ್ಯಯಕಾರಣಾತ್||1||

ವಾನರೋಽ‍ಹಂ ಮಹಭಾಗೇ ದೂತೋ ರಾಮಸ್ಯ ಧೀಮತಃ|
ರಾಮಾನಾಮಾಂಕಿತಂ ಚೇದಂ ಪಶ್ಯ ದೇವ್ಯಂಗುಳೀಯಕಮ್||2||

ಪ್ರತ್ಯಯಾರ್ಥಂ ತವಾssನೀತಂ ತೇನ ದತ್ತಂ ಮಹಾತ್ಮನಾ|
ಸಮಾಶ್ವಸಿಹಿ ಭದ್ರಂ ತೇ ಕ್ಷೀಣ ದುಃಖಫಲಾ ಹ್ಯಸಿ||3||

ಇತ್ಯುಕ್ತ್ವಾ ಪ್ರದದೌ ತಸ್ಯೈ ಸೀತಾಯೈ ವಾನರೋತ್ತಮಃ|
ಗೃಹೀತ್ವಾ ಪ್ರೇಕ್ಷಮಾಣಾ ಸಾ ಭರ್ತುಃ ಕರವಿಭೂಷಣಮ್||
ಭರ್ತಾರಮಿವ ಸಂಪ್ರಾಪ್ತಾ ಜಾನಕೀ ಮುದಿತಾsಭವತ್||4||

ಚಾರುತದ್ವದನಂ ತಸ್ಯಾ ಸ್ತಾಮ್ರಶುಕ್ಲಾಯ ತೇಕ್ಷಣಮ್|
ಅಶೋಭತ ವಿಶಾಲಾಕ್ಷ್ಯಾ ರಾಹುಮುಕ್ತ ಇವೋಡುರಾಟ್||5||

ತತಸ್ಸಾ ಹ್ರೀಮತೀ ಬಾಲಾ ಭರ್ತೃಸಂದೇಶಹರ್ಷಿತಾ|
ಪರಿತುಷ್ಟಾ ಪ್ರಿಯಂ ಕೃತ್ವಾ ಪ್ರಶಶಂಸ ಮಹಾಕಪಿಮ್||6||

ವಿಕ್ರಾಂತಸ್ತ್ವಂ ಸಮರ್ಥಸ್ತ್ವಂ ಪ್ರಾಜ್ಞಸ್ತ್ವಂ ವಾನರೋತ್ತಮ|
ಯೇ ನೇದಂ ರಾಕ್ಷಪದಂ ತ್ವಯೈಕೇನ ಪ್ರಧರ್ಷಿತಮ್||7||

ಶತಯೋಜನವಿಸ್ತೀರ್ಣಃ ಸಾಗರೋ ಮಕರಾಲಯಃ|
ವಿಕ್ರಮಶ್ಲಾಘನೀಯೇನ ಕ್ರಮತಾ ಗೋಷ್ಪದೀಕೃತಃ||8||

ನ ಹಿ ತ್ವಾಂ ಪ್ರಾಕೃತಂ ಮನ್ಯೇ ವಾನರಂ ವಾನರರ್ಷಭ|
ಯಸ್ಯ ತೇ ನಾಸ್ತಿ ಸಂತ್ರಾಸೋ ರಾವಣಾ ನ್ನಾಪಿ ಸಂಭ್ರಮಃ||9||

ಅರ್ಹಸೇ ಚ ಕಪಿಶ್ರೇಷ್ಠ ಮಯಾ ಸಮಭಿಭಾಷಿತುಮ್|
ಯದ್ಯಪಿ ಪ್ರೇಷಿತಸ್ತೇನ ರಾಮೇಣ ವಿದಿತಾತ್ಮನಾ||10||

ಪ್ರೇಷಯಿಷ್ಯತಿ ದುರ್ದರ್ಷೋ ರಾಮೋ ನ ಹ್ಯ ಪರೀಕ್ಷಿತಮ್|
ಪರಾಕ್ರಮ ಮವಿಜ್ಞಾಯ ಮತ್ಸಕಾಶಂ ವಿಶೇಷತಃ||11||

ದಿಷ್ಟ್ಯಾ ಚ ಕುಶಲೀ ರಾಮೋ ಧರ್ಮಾತ್ಮಾ ಸತ್ಯಸಂಗರಃ|
ಲಕ್ಷ್ಮಣಶ್ಚ ಮಹಾತೇಜಾ ಸ್ಸುಮಿತ್ರಾನಂದವರ್ಧನಃ||12||

ಕುಶಲೀ ಯದಿ ಕಾಕುತ್‍ಸ್ಥಃ ಕಿಂ ನು ಸಾಗರಮೇಖಲಾಂ|
ಮಹೀಂ ದಹತಿ ಕೋಪೇನ ಯುಗಾಂತಾಗ್ನಿ ರಿವೋತ್ಥಿತಃ||13||

ಅಥವಾ ಶಕ್ತಿಮಂತೌ ತೌ ಸುರಾಣಾ ಮಪಿ ವಿಗ್ರಹೇ|
ಮಮೈವ ತು ನ ದುಃಖಾನಾಂ ಅಸ್ತಿ ಮನ್ಯೇ ವಿಪರ್ಯಯಃ||14||

ಕಚ್ಚಿನ್ನ ವ್ಯಧಿತೋ ರಾಮಃ ಕಚ್ಚಿನ್ನ ಪರಿತಪ್ಯತೇ|
ಉತ್ತರಾಣಿ ಚ ಕಾರ್ಯಾಣಿ ಕುರುತೇ ಪುರುಷೋತ್ತಮಃ||15||

ಕಚ್ಚಿನ್ನ ದೀನಃ ಸಂಭ್ರಾಂತಃ ಕಾರ್ಯೇಷು ಚ ನ ಮುಹ್ಯತಿ|
ಕಚ್ಚಿ ತ್ಪುರುಷಕಾರ್ಯಾಣಿ ಕುರುತೇ ನೃಪತೇಸ್ಸುತಃ||16||

ದ್ವಿವಿಧಂ ತ್ರಿಪಾಧೋಪಾಯ ಮುಪಾಯ ಮಪಿ ಸೇವತೇ|
ವಿಜಿಗೀಷು ಸ್ಸುಹೃತ್ ಕಚ್ಚಿನ್ ಮಿತ್ರೇಷು ಚ ಪರಂತಪ||17||

ಕಚ್ಚಿ ನ್ಮಿತ್ರಾಣಿ ಲಭತೇ ಮಿತ್ರೈಶ್ಚಾಪ್ಯಭಿಗಮ್ಯತೇ|
ಕಚ್ಚಿತ್ ಕಲ್ಯಾಣಮಿತ್ರಶ್ಚ ಮಿತ್ರೈಶ್ಚಾಪಿ ಪುರಸ್ಕೃತಃ||18||

ಕಚ್ಚಿ ದಾಶಾಸ್ತಿ ದೇವಾನಾಂ ಪ್ರಸಾದಂ ಪಾರ್ಥಿವಾತ್ಮಜಃ|
ಕಚ್ಚಿತ್ ಪುರುಷಕಾರಂ ಚ ದೈವಂ ಚ ಪ್ರತಿಪದ್ಯತೇ||19||

ಕಚ್ಚಿ ನ್ನವಿಗತ ಸ್ನೇಹಃ ಪ್ರವಾಸಾನ್ಮಯಿ ರಾಘವಃ|
ಕಚ್ಚಿ ನ್ಮಾಂ ವ್ಯಸನಾತ್ ಅಸ್ಮಾನ್ಮೋಕ್ಷಯಿಷ್ಯತಿ ವಾನರ||20||

ಸುಖಾನಾಮುಚಿತೋ ನಿತ್ಯಂ ಅಸುಖಾನಾಂ ಅನೂಚಿತಃ|
ದುಃಖಮುತ್ತರಮಾಸಾದ್ಯ ಕಚ್ಚ್ ದ್ರಾಮೋ ನ ಸೀದತಿ||21||

ಕೌಸಲ್ಯಾಯಾ ಸ್ತಥಾ ಕಚ್ಚಿತ್ ಸುಮಿತ್ರಾಯಾಃ ತಥೈವ ಚ|
ಅಭೀಕ್ಷ್ಣಂ ಶ್ರೂಯತೇ ಕಚ್ಚಿತ್ ಕುಶಲಂ ಭರತಸ್ಯ ಚ||22||

ಮನ್ನಿಮಿತ್ತೇನ ಮಾನಾರ್ಹಃ ಕಚ್ಚಿ ಚ್ಛೋಕೇನ ರಾಘವಃ|
ಕಚ್ಚಿ ನ್ನಾನ್ಯಮನಾ ರಾಮಃ ಕಚ್ಚಿ ನ್ಮಾಂ ತಾರಯಿಷ್ಯತಿ||23||

ಕಚ್ಚಿ ದಕ್ಷೌಹಿಣೀಂ ಭೀಮಾಂ ಭರತೋ ಭಾತೃವತ್ಸಲಃ|
ಧ್ವಜಿನೀಂ ಮಂತ್ರಿರ್ಗುಪ್ತಾಂ ಪ್ರೇಷಯಿಷ್ಯತಿ ಮತ್ಕೃತೇ||24||

ವಾನರಾಧಿಪತಿಃ ಶ್ರೀಮಾನ್ ಸುಗ್ರೀವಃ ಕಚ್ಚಿದೇಷ್ಯತಿ|
ಮತ್ಕೃತೇ ಹರಿಭಿರ್ವೀರೈ ರ್ವೃತೋ ದಂತಾನಖಾಯುಧಃ||25||

ಕಚ್ಚಿ ಚ್ಚ ಲಕ್ಷ್ಮಣ ಶ್ಶೂರಃ ಸುಮಿತ್ರಾನಂದವರ್ಧನಃ|
ಅಸ್ತ್ರವಿಚ್ಚರಜಾಲೇನ ರಾಕ್ಷಸಾನ್ ವಿಧಮಿಷ್ಯತಿ||26||

ರೌದ್ರೇಣ ಕಚ್ಚಿದಸ್ತ್ರೇಣ ಜ್ವಲತಾ ನಿಹತಂ ರಣೇ|
ದ್ರಕ್ಷ್ಯಾಂ ಅಲ್ಪೇನ ಕಾಲೇನ ರಾವಣಂ ಸಸುಹೃಜ್ಜನಮ್||27||

ಕಚ್ಚಿನ್ನ ತದ್ದೇಮ ಸಮಾನವರ್ಣಂ
ತಸ್ಯಾನನಂ ಪದ್ಮಸಮಾನಗಂಧಿ|
ಮಯಾ ವಿನಾ ಶುಷ್ಯತಿ ಶೋಕದೀನಂ
ಜಲಕ್ಷಯೇ ಪದ್ಮ ಮಿವಾತಪೇನ||28||

ಧರ್ಮಾಪದೇಶಾತ್ ತ್ಯಜತಶ್ಚ ರಾಜ್ಯಂ
ಮಾಂಚಾಪ್ಯರಣ್ಯಂ ನಯತಃ ಪದಾತಿಮ್|
ನಾಸೀದ್ವ್ಯಧಾ ಯಸ್ಯ ನ ಭೀರ್ನಶೋಕಃ
ಕಚ್ಚಿಚ್ಚ ಧೈರ್ಯಂ ಹೃದಯೇ ಕರೋತಿ||29||

ನ ಚಾಸ್ಯ ಮಾತ ನ ಪಿತಾ ನಾನ್ಯಃ
ಸ್ನೇಹಾ ದ್ವಿಶಿಷ್ಠೋಽಸ್ತಿ ಮಯಾ ಸಮೋ ವಾ|
ತಾವ ತ್ತ್ವಹಂ ದೂತ ಜಿಜೀವಿಷೇಯಂ
ಯಾವತ್ಪ್ರವೃತ್ತಿಂ ಶೃಣುಯಾಂ ಪ್ರಿಯಸ್ಯ||30||

ಇತೀವ ದೇವೀ ವಚನಂ ಮಹಾರ್ಥಂ
ತಂ ವಾನರೇಂದ್ರಂ ಮಧುರಾರ್ಥ ಮುಕ್ತ್ವಾ|
ಶ್ರೋತುಂ ಪುನಸ್ತಸ್ಯ ವಚೋsಭಿ ರಾಮಂ
ರಾಮಾರ್ಥಯುಕ್ತಂ ವಿರರಾಮ ರಾಮಾ||31||

ಸೀತಾಯಾ ವಚನಂ ಶ್ರುತ್ವಾ ಮಾರುತಿ ರ್ಭೀಮವಿಕ್ರಮಃ|
ಶಿರಸ್ಯಂಜಲಿ ಮಾಧಾಯ ವಾಕ್ಯಮುತ್ತರಮಬ್ರವೀತ್||32||

ನ ತ್ವಾ ಮಿಹಸ್ಥಾಂ ಜಾನೀತೇ ರಾಮಃ ಕಮಲ ಲೋಚನೇ|
ತೇನ ತ್ವಾಂ ನಾನಯ ತ್ಯಾಶು ಶಚೀಮಿವ ಪುರಂದರಃ||33||

ಶ್ರುತ್ವೈವ ತು ವಚೋ ಮಹ್ಯಂ ಕ್ಷಿಪ್ರ ಮೇಷ್ಯತಿ ರಾಘವಃ|
ಚಮೂಂ ಪ್ರಕರ್ಷನ್ ಮಹತೀಂ ಹರ್ಯೃಕ್ಷಗಣಸಂಕುಲಾಮ್||34||

ವಿಷ್ಟಂಭಯಿತ್ವಾ ಬಾಣೌಘೈ ರಕ್ಷೋಭ್ಯಂ ವರುಣಾಲಯಮ್|
ಕರಿಷ್ಯತಿ ಪುರೀಂ ಲಂಕಾಂ ಕಾಕುತ್‍ಸ್ಥಃ ಶಾಂತರಾಕ್ಷಸಾಮ್||35||

ತತ್ರ ಯದ್ಯಂತರಾ ಮೃತ್ಯು ರ್ಯದಿ ದೇವಾ ಸ್ಸಹಾಸುರಾಃ|
ಸ್ಥಾಸ್ಯಂತಿ ಪಥಿ ರಾಮಸ್ಯ ಸ ತಾನಪಿ ವಧಿಷ್ಯತಿ||36||

ತವಾದರ್ಶನಜೇ ನಾರ್ಯೇ ಶೋಕೇನ ಸ ಪರಿಪ್ಲುತಃ|
ನ ಶರ್ಮ ಲಭತೇ ರಾಮ ಸ್ಸಿಂಹಾರ್ದಿತ ಇವ ದ್ವಿಪಃ||37||

ಮಲಯೇನ ಚ ವಿಂಧ್ಯೇನ ಮೇರುಣಾ ಮಂದರೇಣ ಚ|
ದರ್ದುರೇಣ ಚ ತೇ ದೇವಿ ಶಪೇ ಮೂಲಫಲೇನ ಚ||38||

ಯಥಾ ಸು ನಯನಂ ವಲ್ಗು ಬಿಂಬೋಷ್ಠಂ ಚಾರುಕುಂಡಲಮ್|
ಮುಖಂ ದ್ರಕ್ಷ್ಯಸಿ ರಾಮಸ್ಯ ಪೂರ್ಣಚಂದ್ರ ಮಿವೋದಿತಮ್||39||

ಕ್ಷಿಪ್ರಂ ದ್ರಕ್ಷ್ಯಸಿ ವೈದೇಹಿ ರಾಮಂ ಪ್ರಸ್ರವಣೇ ಗಿರೌ|
ಶತಕ್ರತು ಮಿವಾಸೀನಂ ನಾಕಪೃಷ್ಠಸ್ಯ ಮೂರ್ಥನಿ||40||

ನ ಮಾಂಸಂ ರಾಘವೋಭುಜ್ಞ್ಕೇ ನಚಾsಪಿ ಮಧುಸೇವತೇ|
ವನ್ಯಂ ಸುವಿಹಿತಂ ನಿತ್ಯಂ ಭಕ್ತಮಶ್ನಾತಿ ಪಂಚಮಮ್||41||

ನೈವದಂಶಾ ನ್ನ ಮಶಕಾನ್ನಕೀಟಾ ನ್ನಸರೀಸೃಪಾನ್|
ರಾಘವೋಽಪನಯೇತ್ ಗಾತ್ರಾತ್ ತ್ವದ್ಗತೇ ನಾಂತರಾತ್ಮನಾ||42||

ನಿತ್ಯಂ ಧ್ಯಾನಪರೋ ರಾಮೋ ನಿತ್ಯಂ ಶೋಕಪರಾಯಣಃ|
ನಾನ್ಯ ಚ್ಚಿಂತಯತೇ ಕಿಂಚಿ ತ್ಸ ತು ಕಾಮವಶಂ ಗತಃ||43||

ಅನಿದ್ರ ಸ್ಸತತಂ ರಾಮ ಸ್ಸುಪ್ತೋsಪಿ ಚ ನರೋತ್ತಮಃ|
ಸೀತೇತಿ ಮಧುರಾಂ ವಾಣೀಂ ವ್ಯಾಹರನ್ ಪ್ರತಿಬುಧ್ಯತೇ||44||

ದೃಷ್ಟ್ವಾ ಫಲಂ ವಾ ಪುಷ್ಪಂ ವಾ ಯದ್ವಾಽನ್ಯ ತ್ಸುಮನೋಹರಮ್|
ಬಹುಶೋ ಹಾ ಪ್ರಿಯೇ ತ್ಯೇವಂ ಶ್ವಸಂ ಸ್ತ್ವಾಂ ಅಭಿಭಾಷತೇ||45||

ಸ ದೇವಿ ನಿತ್ಯಂ ಪರಿತಪ್ಯಮಾನ ಸ್ತ್ವಾಂ ಏವ ಸೀತೇ ತ್ಯಭಿಭಾಷಮಾಣಃ|
ಧೃತವ್ರತೋ ರಾಜಸುತೋ ಮಹಾತ್ಮಾ ತವೈವ ಲಾಭಾಯ ಕೃತಪ್ರಯತ್ನಃ||46||

ಸಾ ರಾಮಸಂಕೀರ್ತನವೀತಶೋಕಾ ರಾಮಸ್ಯ ಶೋಕೇನ ಸಮಾನಶೋಕಾ|
ಶರಮ್ಮಖೇ ಸಾಂಬುದಶೇಷ ಚಂದ್ರಾ ನಿಶೇವ ವೈದೇಹಸುತಾ ಬಭೂವ||47||

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ಆದಿಕಾವ್ಯೇ ವಾಲ್ಮೀಕೀಯೇ
ಚತುರ್ವಿಂಶತ್ ಸಹಸ್ರಿಕಾಯಾಂ ಸಂಹಿತಾಯಾಮ್
ಶ್ರೀಮತ್ಸುಂದರಕಾಂಡೇ ಷಟ್ರ್ತ್ರಿಂಶಸ್ಸರ್ಗಃ ||

||ಓಮ್ ತತ್ ಸತ್||